Author: newshub

Majalisar dokokin jihar Kano ta shirya samar da doka da za ta bai wa malamai damar koyar da darussan kimiyya da fasaha da harshen uwa a makarantun jihar, domin kara inganta fahimtar ɗalibai da kuma tabbatar da cewa tsarin ilimi ya dace da yanayin su na gida.

Dan majalisar dokoki mai wakiltar Takai, Hon Dakta Musa Ali Kachako, ne ya gabatar da wannan kudiri a zaman majalisar, inda ya bukaci a kafa doka bisa tanadin Manufar Harshen Kasa ta shekarar 2022, wacce ta tanadi koyar da darussa da harshen uwa a matakin Firamare da na ƙaramin Sakandare.

Newshub24 Hausa ta rawaito Dokta Kachako ya bayyana cewa, koyar da kimiyya da fasaha da harshen gida zai ba dalibai damar fahimtar darussa cikin sauƙi, tare da haɓaka sha’awarsu wajen nazari da gwaje-gwaje. Ya ce hakan zai taimaka wajen samar da ƙarni na matasa masu kwarewa da ƙwazo a fannoni na kimiyya, fasaha da kirkire-kirkire, wanda zai taimaka wajen ci gaban jihar da ƙasa baki ɗaya.

Ya kara da cewa, tsarin koyarwa da harshen uwa yana da muhimmanci wajen kare harsunan gida daga bacewa, tare da tabbatar da cewa al’adun gargajiya suna ci gaba da wanzuwa a tsakanin matasa. A cewarsa, harshen uwa shi ne ginshikin ilimi, domin shi ɗalibai ke fara fahimta tun suna ƙanana, kuma hakan na haifar da gagarumin tasiri ga nasu cigaban tunani.

Wasu ‘yan majalisar da suka tofa albarkacin bakinsu, sun bayyana goyon bayansu ga wannan kudiri, inda suka ce lokaci ya yi da za a canza tsarin koyarwa daga dogaro da harshen Turanci zuwa amfani da harsunan gida kamar Hausa, Fulfulde, da Kanuri domin ya zama tsarin ilimi mai tushe da amfani ga ɗalibai.

Majalisar ta kuma jaddada bukatar aiwatar da wannan kudiri cikin gaggawa, tare da haɗin gwiwar Ma’aikatar Ilimi da sauran hukumomin da abin ya shafa, domin tabbatar da ingantaccen shiri na koyarwa, fassarar littattafai da horas da malamai da zasu iya koyar da kimiyya da fasaha da harshen uwa.

A ƙarshe, majalisar ta bayyana cewa wannan doka idan aka kafa ta, za ta zama sabuwar kafa ta ci gaban ilimi a jihar Kano, wacce za ta taimaka wajen samar da ingantattun ɗalibai da ke fahimtar darussa cikin sauƙi tare da kare harshen uwa da al’adun yankin.

Gwamnatin Jihar Kano karkashin jagorancin Alhaji Abba Kabir Yusif ta bayyana cewa ba za ta yi watsi da matasan da suka tuba daga harkar fadace fadacen daba ba, domin kuwa suna da baiwar da suke da ita wacce za ta amfanar da al’umma muddin aka basu kulawar da ta dace.

Kwamishinan Yaɗa labarai da harkokin cikin gida na jihar, Kwamared Ibrahim Abdullahi Waiya, ne ya bayyana hakan a yayin wani taron da aka shirya domin karɓar wasu daga cikin matasan da suka yanke shawarar barin harkar daba.

Kwamishinan ya bayyana cewa zuwa yanzu an tantance matasa sama da dubu 1 da 600 da aka saka cikin shirin Safe Corridor, kuma nan gaba kadan za’a ci gaba da tantance wasu matasa 2,100 domin su ma su shiga cikin shirin.

Haka kuma ya ce bayan kammala wannan mataki za a mika su gaban gwamna domin karɓar tallafin da zai basu na dogaro da kansu.

Waiya ya tabbatar da cewa gwamnatin kano za ta ci gaba da tallafawa matasan da suka nuna dabi’u masu kyau wajan samun ingantacciyar rayuwa.

Da yake nasa jawabin a madadin maimartaba sarkin Kano Dan Amar din Kano Alhaji Aliyu Harazimi ya bukaci Matasan da su dage wajen komawa ga Allah, domin hakan yana kawar da mutane daga aikata abubun da basu dace ba

wannan shine karo na uku da kwamishin na yada labarai da harkokin cikin gida na kano Kwamared Ibrahim Abdullahi Waiya, ya jagoranci zaman tattaunawa da kwamitin zaman lafiya na safe Corridor domin cigaba da tattance su da kuma samar da hanyoyin cika musu alkawarin da gwamnatin kano ta dauka a kansu.

Hukumar kula da zirga-zirgar ababen hawa ta Jihar kano (KAROTA) tayi alkawarin mika bukatun daliban Jami’ar Sule Lamido dake Kafin Hausa, a Jihar Jigawa, ‘yan asalin Jihar Kano, domin magance musu matsalolin sufuri daga Kano zuwa Jihar Jigawa.

Shugaban hukumar KAROTA, Hon. Faisal Mahmud Kabir, ne ya bayyana hakan yayin da ya karɓi baƙuncin ƙungiyar daliban Jami’ar Sule Lamido dake Kafin Hausa, a makon da ya gabata.

Cikin wata sanarwa da Jami’in Yaɗa Labarai na Hukumar, Abubakar Ibrahim Sharada, ya fitar a yau Lahadi, 2 ga watan Nuwamba 2025.

shugaban hukumar ya kuma bukaci daliban da su kasance jakadu na gari, waɗanda Jihar Kano za ta yi alfahari da su a nan gaba.

Hon. Faisal ya ƙara da cewa, hukumar za ta tuntubi ma’aikatar Aiyuka domin samar musu da dakunan kwana ga daliban Jihar Kano sama da 4,000, domin rage musu kuɗin masauki, Da kuma tallafa musu wajen samun ilimi cikin sauƙi.

A nasa jawabin, shugaban ƙungiyar daliban Jami’ar Sule Lamido dake Kafin Hausa, Comrade Habibu Abdullahi Abubakar, ya bayyana cewa sun kai wannan ziyara ne domin miƙa buƙatun ƙungiyar, tare da ƙara ƙarfafa alaƙar haɗin gwiwa tsakanin daliban da hukumar KAROTA.

A ƙarshe, shugaban hukumar KAROTA, Hon. Faisal Mahmud Kabir, ya gode wa daliban bisa wannan ziyara da suka kawo masa, tare da bayar da tabbacin cewa hukumar za ta ci gaba da tallafa musu duk lokacin da buƙatar hakan ta taso.