A karamar hukumar Rano ta Jihar Kano, al’umma daga sassa daban-daban sun yi tururuwa a safiyar yau domin tarbar shugaban karamar hukumar, Hon. Naziru Rano, wanda ya dawo bakin aiki bayan ɗan hutu.
Tun kafin isowarsa, daruruwan maza da mata sun cika filin taro tare da rera wakoki da kwararo addu’o’i na fatan alheri. Wani bangare na jama’a ma sun bayyana cewa dadadden kishin ci gaba da shugabancin Hon. Naziru Rano ne ya sa suka fito kwansu da kwarkwata domin nuna goyon bayansu gare shi.
Da yake jawabi bayan isowa, Hon. Naziru Rano ya gode wa al’ummar Rano bisa wannan tarba ta musamman da suka yi masa, yana mai tabbatar musu da cewa zai ci gaba da gudanar da ayyukan da suka shafi ci gaban al’umma da inganta rayuwar jama’a.
Wasu daga cikin al’ummar da suka halarci taron sun bayyana farin cikinsu, suna cewa dawowarsa ya zo a lokacin da ake bukatar sa ido da sauri kan wasu muhimman shirye-shiryen da ake aiwatarwa a yankin.
Taron ya gudana cikin natsuwa, inda aka rufe shi da addu’o’i na neman zaman lafiya, ci gaba, da samun nasara ga karamar hukumar Rano baki ɗaya.
