Fitaccen ɗan kasuwar Afirka, Aliko Dangote, ya sake jaddada muhimmancin bunƙasa kayayyakin more rayuwa, samar da ayyukan yi, da kuma zuba jari daga ɓangaren kamfanoni masu zaman kansu domin ƙara inganta tattalin arzikin Afirka.
Dangote ya bayyana hakan ne yayin wata jerin ganawa da manyan shugabannin kuɗi na duniya a taron International Monetary Fund (IMF) da World Bank na bazara da aka gudanar a Washington, D.C. Ganawar na daga cikin ƙoƙarinsa na jawo ƙarin jarin waje da ƙarfafa haɗin gwiwa a fannonin makamashi da masana’antu a Najeriya.
Yayin da yake gabatar da muhimmin jawabi a taron “Water Forward” na Bankin Duniya, Dangote ya jaddada buƙatar ƙara sa hannun kamfanoni masu zaman kansu domin inganta tsarin ruwa a matsayin ginshiƙi na masana’antu da samar da ayyukan yi a ƙasashe masu tasowa. Ya bayyana cewa kayayyakin more rayuwa, musamman ingantaccen tsarin kula da ruwa, na da matuƙar muhimmanci wajen samar da ci gaba mai ɗorewa da haɗa kowa da kowa.
Ya ce: “Ci gaban Afirka zai dogara ne kan yadda za mu zuba jari a kayayyakin more rayuwa da ke tallafa wa masana’antu, samar da ayyukan yi, da kuma ƙara yawan amfanin aiki a faɗin nahiyar. Idan ɓangaren kamfanoni masu zaman kansu ya shiga sosai, musamman a fannoni kamar ruwa da makamashi, zai zama babban ginshiƙi na ci gaba mai ɗorewa da haɗa kowa da kowa.”
A yayin ganawar, Dangote ya kuma tattauna da shugaban Bankin Duniya, Ajay Banga, inda suka mayar da hankali kan yadda za a ƙara zuba jari cikin ɓangaren masana’antu na Afirka. Ya bayyana cewa saurin bunƙasa masana’antu na da matuƙar muhimmanci wajen ƙarfafa tattalin arziki, rage dogaro da waje, da kuma kare nahiyar daga girgizar tattalin arziki ta duniya.
Haka kuma, Dangote ya bayyana shirin hangen nesa na 2030 na kamfanin Dangote Group, wanda ke da burin faɗaɗa ayyuka a matatar mai ta Dangote, masana’antar taki da sinadarai, da sauran sassa, tare da burin samun kudaden shiga na dala biliyan 100 a shekara. A cewarsa, wannan tsari na nuna jajircewar kamfanin wajen haɓaka masana’antu a Afirka da ci gaba mai ɗorewa.
A ƙarshe, Dangote ya sake jaddada cewa haɗin gwiwa mai ƙarfi daga ɓangaren kamfanoni masu zaman kansu tare da ingantattun kayayyakin more rayuwa na da muhimmanci wajen amfani da albarkatun ruwa yadda ya kamata da kuma cimma ci gaba mai amfani ga kowa a Afirka.
Taron na Bankin Duniya ya samu halartar manyan baƙi, ciki har da shugabannin ƙasashe, Sakatare Janar na Majalisar Ɗinkin Duniya, shugabannin cibiyoyin ci gaban Turai, da wakilan ƙungiyoyin bunƙasa tattalin arziki na duniya.
Leave a Reply